Seguro di Accident

Kico ta e seguro di accidente?

E seguro di accidente ta percura pa un trahado haya parti di su salario den caso cu e trahado no por traha pa motibo di un accidente di trabao. Den caso cu un asegurado fayece a consecuencia di un accidente di trabao, e seguro di accidente ta regla e derechonan di su casa, yiu(nan) of di otro personanan cu ta depende di e difunto pa nan gastonan di mantencion.

Cual trahadonan ta cay bao e seguro di accidente?

Tur trahado den sector priva ta cay bao e seguro di accidente, pero pa por ricibi e benificionan e ta obliga di inscribi na SVb.

E siguiente categorianan di trahado no ta cay bao e seguro di accidente:

• E doño di trabao y/of su casa cu ta traha pa su propio riesgo y cu ta ricibi pago.
• E yui(nan) of mayor(nan) di un doño di trabao cu ta traha den su propio compania y cu no ta ricibi pago of cu ta ricibi pago bao nivel di e sueldo minimo.
• Personal domestico.
• Capitan of navegante riba barco bao bandera di Aruba.
• Empleadonan publico of empleadonan cu tin status legal igual na empleadonan publico.
• Trahadonan cu ta traha na cas.

E trahado cu a haya un malesa a consecuencia di un conducta prohibi, un acto intencional of descuido serio di e trahado, no por bin na remarca pa ricibi compensacion.

Kico ta un accidente di trabao?

Un accidente di trabao ta un accidente cu ta sosode durante trabao, y ta relaciona cu ehecucion di e trabao, cu consecuencia cu e trahado ta keda incapacita pa traha. Tambe ta considera como accidente di trabao, un accidente cu ta tuma luga na caminda pa of for di trabao usando e caminda mas cortico, of un malesa cu ta surgi despues di trabao cual ta relaciona cu ehecucion di trabao.

Cuanto e compensacion ta pa dianan di AO?

Desde e di dos dia cu e trahado a notifica SVb cu e ta incapacita pa traha pa motibo di accidente di trabao, e tin derecho riba compensacion. Tur trahado ta ricibi 100% di su salario den e prome aña di incapacidad pa traha pa motibo di accidente di trabao. Despues di e prome aña, e compensacion ta bira 80% di e salario. Den caso cu e trahado keda incapacita permanentemente, SVb ta determina e nivel di incapacidad. A base di e nivel di incapacidad e trahado ta ricibi compensacion. Pa un trahado por ricibi compensacion pa accidente di trabao, e trahado mester entrega un bedrijfsongevallenformulier dentro di 1 aña, yena y firma pa su doño di trabao.

Fayecimento di Asegurado

Den caso cu un asegurado fayece, SVb ta rekiri pa wordo informa di esaki dentro di 30 dia despues di e fayecemento. Esaki pa preveni cu na prome instante primanan ta wordo cobra dimas na e empresa; tambe si tabata AO cu lo mester paga bek compensacion di ziekengeld cu a ricibi dimas.

Pa haci esaki por manda un email cu e siguiente informacion di e fayecido na medisch@svbaruba.org:

• Nomber(nan) y fam (fam di soltera) ful
• Fecha di nacemento
• Fecha di fayecemento
• Empresa(nan) unda ta inscribi
• Overlijdensakte/ Certificado di defuncion

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of mediante e formulario aki.