Tag Archives: servicio di SVb

Despues di preparacion pa algo mas cu dos aña, Banco di Seguro Social di Aruba SVb ta duna inicio na un proyecto unico pa nos organisacion. Diahuebs 18 di januari 2018 den Aula di Universidad di Aruba a tuma luga e ceremonia cu a duna inicio na e estudio di specialisacion pa dokternan general cu ta trahando na SVb, Opleiding tot Arts voor Arbeid en Gezondheid Aruba (AAGA). E estudio aki a bira posibel danki na e cooperacion di The Netherlands School for Public and Occupational Health (NSPOH).

Desde 2009 e cuerpo medico na SVb a amplia y na 2015 a mira e necesidad atrobe pa ofrece e dokternan pa sigui cu un estudio specialisa.  Pa esaki SVb Aruba aserca dr. Harrie Veneman, ex-hefe di e departamento medico na SVb kende actualmente ta traha na NSPOH. Hunto cu dr. Veneman a dicidi di asumi e reto di inverti den esaki y NSPOH di nan banda a desaroya un programa pa un estudio di specialisacion, adapta na e realidad di Aruba, garantisando e calidad pa cual NSPOH ta conoci p’e.

SVb ta encarga cu dos ley hopi importante pa trahadonan den sector priva. Esaki nan ta e leynan di seguro di malesa y seguro di accidente di trabao. E leynan aki ta otorga un trahador segura e derecho riba compensacion di su sueldo den caso di malesa of accidente di trabao. Esaki ta trece cune cu SVb mester determina si e trahador segura tin un malesa of a sufre un accidente di trabao cu ta strobe di haci su trabao. E staf medico di SVb ta e unico profesionalnan autorisa pa e dos leynan pa determina si un persona tin derecho of no riba compensacion y pa cuanto tempo.  Actualmente e staf medico aki ta forma pa dokternan general, dokternan di seguro y dokternan di empresa. E ultimo dosnan aki ta dokternan specialisa.  Cu inicio di e specialisacion aki SVb ta brinda henter su staf medico e oportunidad pa specialisa nan mes den e campo di medicina social, e ramo di medicina cu ta studia e relacion entre salud y trabao.

Despues di un periodo largo di preparacion, unda dr. Ron Bieze, hefe di departamento di Labor y Salud na SVb, a hunga un papel importante, na augustus aña pasa e programa a keda aproba pa gerencia di NSPOH y na september SVb a firma e contract cu NSPOH. Asina cu orguyo SVb a presenta e grupo di dokter cu lo specialisa, kendenan ta dr. Christian Mejia, dr. Flavia Pinedo, dr. Miguel Genser, dr. Myron Genser y dr.  Melissa de Cuba y ta desea nan hopi exito den nan studio. Pa SVb e estudio aki ta sumamente importante y ta ancra e base pa futuro programanan cu lo ofrece na nos dokternan di SVb.