Flex-Pensioen
Flex Pensioen kico e ta?
E Flex Pensioen ta encera cu e persona cu ta haya e derecho riba un pensioen di biehes di SVb, ta haya e derecho tambe pa pospone cobransa di su pensioen cada bes cu 1 aña. Por ehempel; un persona por scoge pa no cobra su pensioen di biehes ora e yega su edad di pensioen y por cuminsa cobra esaki despues di 1 aña. Cada siguiente aña e persona por bolbe dicidi di pospone e pensioen cu un aña adicional. Esaki e por haci pa un maximo di 5 biaha.
Kico ta e beneficio cu mi ta ricibi a cambio di pospone mi pensioen?
Pa cada aña cu un persona pospone su pensioen di biehes, e suma di su pensioen acumula te na e momento ey ta aumenta cu 7%.
Laga nos ilustra esaki cu un ehempel di e pensioen pa un persona soltero. Na momento di yega su edad di pensioen e persona aki tin derecho riba e suma di AWG 1.265,- florin pa luna. E ta dicidi di pospone su pensioen. E siguiente aña su pensioen di biehes ta aumenta cu 7% di AWG 1.265,- y ta bira AWG 1.354,- florin pa luna*.
Si e persona dicidi di pospone un biaha mas, su pensioen lo sigui aumenta cu 7% di AWG 1.354,- y bira AWG 1.448,- florin pa luna*. E tabel akibao ta duna un bista di con e pensioen di soltero y pensioen di casa ta aumenta ora cu e keda pospone*.
| Pensioen soltero pa luna* |
Pensioen casa pa luna* | Pensioen casa splits pa luna* | |
| Edad di pensioen | 1.265,- | 2.130,- | 1.065,- |
| Edad di pensioen + 1 aña | 1.354,- | 2.279,- | 1.140,- |
| Edad di pensioen + 2 aña | 1.448,- | 2.439,- | 1.219,- |
| Edad di pensioen + 3 aña | 1.550,- | 2.609,- | 1.305,- |
| Edad di pensioen + 4 aña | 1.658,- | 2.792,- | 1.396,- |
| Edad di pensioen + 5 aña | 1.774,- | 2.987,- | 1.494,- |
*E sumanan menciona akiriba ta afgerond, ademas ta un proyeccion di e situacion real y lo por varia, depende e situacion personal di e pensionado cu ta desea di haci uzo di e Flex-Pensioen.
Si mi casa a cuminsa cobra pensioen di biehes caba, ora mi yega mi edad di pensioen mi por pospone mi parti pa mi haya mas pension?
Si, den caso cu bo casa a cuminsa cobra pensioen di biehes caba, na momento cu bo persona yega bo edad di pensioen bo ta haya e derecho pa pospone bo parti di pensioen cu bo persona tin derecho ariba dje.
Laga nos ilustra esaki cu un ehempel. Bo casa a yega su edad di pensioen y e ta ricibiendo AWG 2.130,- florin pa luna na pensioen. Na momento cu bo persona yega bo edad di pensioen, bo persona ta haya derecho riba AWG 1.065,- florin di e AWG 2.130,-. Si bo dicidi di pospone bo pensioen, bo pensioen ta aumenta cu 7%. E siguiente aña bo ta cobra un pensioen di AWG 1.140,- florin pa luna.
Un pareha ta permiti pa pospone un maximo di 5 biaha. Pa esaki ta conta e biahanan cu cada un a pospone. Por ehempel si e partner cu a yega edad di pensioen prome pospone 2 biaha, e otro partner na momento cu e yega edad di pensioen por pospone su parti di pensioen solamente 3 biaha. Asina hunto e pareha ta pospone 5 biaha.
Kico mi mester haci pa mi por pospone mi pensioen?
Ora cu ta bay aplica pa Pensioen di Biehes, tin e posibilidad pa indica cu ta desea di haci uzo di e Flex-pensioen. Pues pa e prome aña ta indica dibiaha cu e aplicacion cu ta bay haci uzo di Flex-pensioen.
Pa e siguiente aña(nan) si ta desea di sigui haci uzo di Flex-pensioen, mester tuma contacto cu Departamento di Pensioen prome cu e ultimo luna cu a pospone y a haci uzo di Flex-pensioen pasa. Una bes a drenta e siguiente aña di pensioen no por haci uzo mas di Flex-pensioen y ta cuminsa cobra e pensioen.
Mester corda cu bo derecho riba pensioen ta cuminsa e luna siguiente despues di a yega bo edad di pensioen. Por ehempel, si bo ta cumpli aña den januari, bo derecho riba pensioen ta cuminsa na riba prome di februari.
Tur hende por dicidi di pospone su pensioen?
Si, tur persona cu ta cumpli cu e exigencianan pa haya pensioen di biehes por dicidi di pospone su pensioen.
Si mi dicidi di pospone mi pensioen, na caminda mi por revoca e posponemento?
No, durante e aña cu bo persona pospone e pensioen bo no por revoca esaki.
Si mi entrega mi peticion pa pensioen despues cu mi a yega edad di pensioen, mi por pospone mi pensioen ainda?
No, pa por pospone bo pensioen di biehes e peticion pa pospone mester keda entrega un luna prome e derecho riba pensioen di biehes drenta na vigor.
Si mi tin edad di pensioen of mas, mi ta trahando y mi a pospone mi pensioen, mi mester paga premie di AOV?
No, despues di edad di a yega bo edad di pensioen bao ningun circumstancia ta paga premie di AOV.
Mas informacion
Pa mas informacion por tuma contacto cu Departamento di Pensioenen:
- via Whatsapp 527-2760 (solamente mensahe, no por ricibi yamada)
- via email pensioenen@svbaruba.org
- via telefon 527-2760
- via e formulario di contacto
Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.
