Fayecimento di Pensionado
Fayecimento di Pensionado
Ora un pensionado fayece esaki ta trece diferente consecuencia pa e pensioen cu e fayecido tabata ricibi, ademas tambe e tin cierto consecuencianan pa su famia. E consecuencianan ta depende di e estado civil di e pensionado y si e ta sigura pa gastonan di entiero.
Ley ta prescribi cu SVb tene cuenta cu dos diferente situacion:
- e pensionado cu a fayece tabata casa bibando hunto
- e pensinado tabata soltero of casa pero bibando separa.
Akibao ta splica ambos situacion:
1. Si e fayecido tabata casa y bibando hunto:
Pa e fayecido tabata ricibi pensioen pa pareha casa cu ta bibando hunto (full e suma riba nomber di un persona of cada persona un suma igual na otro) e siguiente ta aplicabel:
- Pensioen: SVb ta sigui paga e suma di pensioen pa 3 luna largo despues di e fecha di fayecimento.
- Gastonan di entiero: SVb ta compensa e persona of instancia cual ta para responsabel pa e gastonan di entiero un suma di no mas cu Afl. 3.471,- pa e gastonan di entiero.
2. Si e fayecido tabata soltero, of casa bibando separa:
Pa e fayecido cual tabata ricibi:
- pensioen pa viuda of viudo,
- of pensioen di biehes pa soltero,
- of pensioen di biehes pa pareha casa cu ta bibando separa,
- of pensioen di biehes pa pareha cu no ta casa y ta bibando hunto,
e siguiente ta aplicabel:
- Pensioen: e pensioen ta caduca desde e prome di e sigiuente luna despues di fayecimento. Pues desde e luna despues di a fayece SVb no ta paga pensioen mas na e pensionado of esun cu tin volmacht pa ricibi su pensioen.
- Gastonan di entiero: SVb ta compensa e persona of instancia cual ta para responsabel pa e gastonan di entiero 3X e suma di su pensioen mensual. Den caso cu e fayecido tabata tin un seguro di entiero cerca un otro compania SVb ta compensa e diferencia entre e suma pa cual e fayecido ta sigura y e suma total di e gastonan di entiero.
Aplica di nobo pa pensioen
Tene cuenta tambe cu pa por sigui haya pensioen despues di fayecimento di su casa, e viuda of viudo mester aplica na SVb pa e por ricibi pensioen di biehes (pa esnan cu edad di pensioen) of pensioen di viuda of viudo (pa esnan cu edad bao di edad di pensioen).
Pagonan haci inhustamente
Den caso cu SVb inhustamente paga un luna of mas di pensioen despues di e fayecimento, e suma total cu a keda inhustamente paga ta wordo reduci for di e suma total pa e gastonan pa entiero.
Compensacion pa gastonan di entiero
Pa por ricibi e compensacion pa e gastonan di entiero e persona of instancia responsabel pa gastonan di entiero mester aplica na Departamento di Pensioen dentro di 30 dia despues di e fecha di fayecimento. Si e pensionado ta laga atras un viuda of viudo mester aplica dentro di 28 dia.
Ta suficiente pa notifica SVb mediante un email dentro di e periodo di 30 of 28 dia pa cumpli cu e aplicacion pa e compensacion na pensioenen@svbaruba.org.
Mas informacion
Pa mas informacion por tuma contacto cu Departamento di Pensioenen:
- via Whatsapp 527-2760 (solamente mensahe, no por ricibi yamada)
- via email pensioenen@svbaruba.org
- via telefon 527-2760
- via e formulario di contacto
Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.
