Parlamento a aproba e ‘Landsverordening tijdelijke loonsubsidie’.
Diamars 30 november 2021 Parlamento di Aruba a aproba e Landsverordening Tijdelijke Loonsubsidie. Cu e aprobacion aki a formalisa e autoridad di SVb pa colecta sumanan di loonsubsidie cu dunado di trabao a ricibi di mas.
Despues di e anuncio oficial di e landsverordening aki SVb lo reinicia e procedura di colecta di e siguiente forma:
- Dunado di trabao kende tin un debe habri di loonsubsidie cual a ricibi inhustamente, lo ricibi un carta di recordatorio den cual e debe aki ta specifica. Cu e carta aki ta pidi e dunado di trabao pa paga e debe of pa yega na un areglo di pago cu SVb dentro di dies dia di trabao.
- Den caso cu SVb no ricibi un reaccion lo manda un siguiente carta di demanda unda atrobe ta ofrece un oportunidad pa paga e debe of pa yega na un areglo di pago dentro di dies dia di trabao.
- Den caso cu e dunado di trabao keda sin cumpli, deurwaarder di SVb lo presenta un dwangschrift pa cumpli cu pago of yega na un areglo dentro di tres dia di trabao.
- Den caso cu no cumpli cu e dwangschrift e deurwaarder lo continua cu e procedura di embargo.
SVb ta spera cu no lo yega asina leu y ta urgi tur dunado di trabao cu tin debe di loonsubsidie pa tuma contact cu SVb su departamento di Invordering.
Salario Registra na SVb
Conforme e decreto ministerial (MB 681/20 ; MB 681-B/20) di Subsidio di Salario un di e rekisitonan cu mester a cumpli cun’e tabata e reduccion di oranan di trabao cu entre 0% te cu 40%. Consecuentemente e salario a baha cu e mesun porcentahe. Esaki no kiermen cu e salario pa ora “uurloon” a cambia, solamente tabatin un reduccion den cantidad di oranan di trabao pa motibo cu no tabata tin suficiente trabao pa cubri e oranan normal di trabou pa dia.
Pa cu esaki, a yena e porcentahe di reduccion den e luna pa cual ta pidi subsidio di salario y e empleadonan mester a firma tur luna cu ta bay di acuerdo cu e reduccion. Esaki mester a keda entrega tur luna hunto cu e peticion pa subsidio di salario. Ta resalta un biaha mas cu esaki tabata un rekisito pa por a haya e subsidio di salario.
Pues awor cu e subsidio di salario a stop desde 1 di november 2021, no lo por aplica pa esaki mas. Awor cu actividad economico ta mehorando, e dunado di trabao lo por pidi empleadonan pa traha 8 ora bek.
Den caso cu e trahador ta bay bek traha full su oranan segun su contrato laboral e tin derecho tambe riba e salario contrata, ekivalente na su uurloon multiplica cu su oranan di trabao. Cu excepcion si e dunado di trabao hunto cu empleado of sindicato cera otro acuerdo, por ehempel den caso cu e situacion financiero di e compania no ta permiti un aumento di e gastonan salarial. Segun hurisprudencia dunado di trabao pa por yega na e acuerdo tin e obligacion pa habri boeki pa e trahado of sindicato pa demostra cu su situacion financiero ta malo.
Pa cu esaki SVb ta pidi cooperacion tambe di tur dunado di trabao pa ahusta e salarionan atrobe segun e salario stipula den e contrato laboral vigente of e salario nobo segun e acuerdo ultimo cu a cera cu e empleado of sindicato.
Pa informacion tocante obligacion- y derechonan laboral por acudi na Directie Arbeid en Onderzoek (DAO).
Control di Sobrevivencia Islanan BES
control di sobrevivencia
Pago di Subsidio di Salario a termina entrante 1 november 2021
SVb Aruba ta anuncia cu e areglo di Subsidio di Salario a termina entrante 1 di november 2021. Esaki ta nifica cu pa luna di november no lo otorga dicho subsidio mas.
Punto 11 di e areglo di Subsidio di Salario (MB 681/20) ta mara e pago di subsidio di salario na e sosten di likides cu Aruba ta ricibi for di Hulanda. Mirando cu pa e ultimo kwartaal di 2021 esaki no a wordo otorga na Pais Aruba, e ta nifica cu e pago di subsidio di salario no por continua.
SVb Aruba por medio di esaki ta anuncia cu e pago di e subsidio di salario a termina entrante 1 di november 2021. Esaki ta nifica cu entrante luna di november no por aplica pa subsidio di salario mas y no lo tin pago di dicho subsidio mas.
SVb Aruba ta sigui cu e administracion, control y eventual cobransa di e subsidionan cu a ser paga caba y ta sigui procesa tur obhecion cu ta pendiente ainda di e periodonan di subsidio anterior.
Pa mas informacion tocante e areglo di Subsidio di Salario por tuma contacto cu loonsubsidie@svbaruba.org.
Recordatorio Subsidio di Salario – October 2021
Awe, diaranson 27 di october, ta e ultimo dia cu por aplica pa subsidio di salario pa luna di october
Como dunado di trabou bo tin te fin di dia (11:59 pm) pa entrega bo aplicacion. Un dunado di trabou cu ta aplica pa subsidio di salario pa luna di october mester a cumpli cu e pago di tur prima y seguro social pa lunanan di mei 2021 te cu september 2021. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di un dunado di trabou pa paga e primanan aki.
Tambe tur dunado di trabou mester percura pa den nan MiSVb tin e salarionan real di nan trahadonan registra. SVb ta controla esaki y si e dunado di trabou no tin e salario real registra e por afecta e pago di subsidio di salario.
TENE NA CUENTA CU E TA E RESPONSABILIDAD DI E DUNADO DI TRABOU PA CONTROLA E INFORMACION DI APLICACION Y NO DI E TRAHADO. EN CASO CU DUNADO DI TRABOU ENTREGA UN PETICION CU NO TA CORECTO Y/OF CU FALTA INFORMACION ESAKI TA CONDUCI NA RECHASO DI E PETICION PA SUBSIDIO DI SALARIO. VERIFICA TUR DOCUMENTO Y FORMULARIO PROME CU ENTREGA!
Si bo tin pregunta, nos service center digital tey pa asisti bo. Mail nan na loonsubsidie@svbaruba.org.
Aplicacion Sosten Financiero Kwartaal 4 2021
SVb ta anuncia cu e periodo di aplicacion pa Sosten Financiero pa Empresa Chikito y Mediano pa e di cuatro kwartaal di 2021 ta di 22 di october te cu 28 di october, 2021
Empresanan chikito y mediano cu ta bin na remarke pa aplica pa Sosten Financiero pa Empresa Chikito y Mediano (Sosten Financiero) lo ricibi un notificacion di SVb cu mas informacion y nan lo por aplica desde diabierna, 22 di october, 2021 pa 9 ‘or di mainta te cu diahuebs, 28 di october, 2021 na fin di dia (te cu 11:59 PM).
E pago di e Sosten Financiero no ta bay automaticamente y si no aplica, no ta ricibi e sosten financiero.
Pa por tin derecho ariba e Sosten Financiero, e compania mester cumpli cu e siguente rekisitonan:
- E compania ta registra na SVb cu un minimo di 1 y maximo di 50 empleado;
- Tur empleado mester ta registra cerca SVb riba 15 maart 2020;
- E compania ta registra na Camara di Comercio riba 15 maart 2020 (cu excepcion pa esnan cu no tin obligacion legal di ta registra);
- E compania ta registra na Departamento di Impuesto riba 15 maart 2020 y tin un persoonsnummer;
- E compania a cumpli cu declaracion di BBO pa lunanan di april te cu december, 2020 como tambe di januari te cu september 2021;
- E compania ta spera perdida di entrada di benta di por lo menos 25% pa e lunanan october, november y december 2021. E comparacion ta entre october, november y december 2019 cu october, november y december 2021;
- E compania ta estableci fisicamente na Aruba;
- E compania no ta failliet;
- E compania no tin peticion pa suspencion di pago na Corte di Husticia;
- E ayudo di Afl 4.000,- no ta parti di e benta di e compania.
E formulario di aplicacion ta bay ta disponibel den e portal digital MiSVb di e compania. Entrante 22 di october, 2021 pa 9 ‘or di mainta e compania por drenta den su MiSVb cu su credencial y ta busca e formulario. Ta yena esaki completo y primi ariba ENTREGA PETICION. No por haci cambio despues di entrega e peticion y ta 1 oportunidad so tin pa aplica.
SVb sta ehecuta e pago di Sosten Financiero despues cu e periodo di aplicacion sera, riba diabierna 29 di october, 2021.
SVb ta recorda tur dunado di trabou cu nan mester cumpli cu pago di tur prima social como tambe belasting.
Despues di e di tres kwartaal di e Sosten Financiero lo haci un evaluacion di e recuperacion economico pa asina determina si e Sosten Financiero lo sigui pa e ultimo kwartaal di 2021.
Pa facilita e proceso di aplicacion y contesta pregunta di empresa chikito y mediano relaciona cu e programa di Sosten Financiero por tuma contacto cu e Helpdesk via mail na helpdeskmkb@svbaruba.org. Tambe por haya mas informacion riba e pagina di Sosten Financiero: https://www.svbaruba.org/sosten-financiero/.
Subsidio di Salario – October 2021
Desde 21 di october pa 9 ‘or di mainta te cu 27 di october na fin di dia (11:59 PM), dunadornan di trabou cu ta bin na remarke por aplica pa subsidio di salario pa luna di october.
Tur dunado di trabou cu ta bin na remarke pa aplica pa subsidio di salario den luna di october ta ricibi un notificacion di SVb cu informacion importante pa cu e aplicacion (corda pa semper controla e junk/spam folder).
Rekisito
Pa luna di october e rekisitonan cu mester cumpli cun’e ta keda mescos:
1. E compania a wordo afecta den un forma negativo pa motibo di COVID-19;
2. E compania tin un perdida di entrada premira di por lo menos 25% den e luna di e subsidio;
3. E compania no ta permiti pa retira empleado pa motibonan socio-economico;
4. E compania ta paga e empleado minimal 60% di su salario;
5. E compania y tur empleado ta registra na SVb riba 15 di maart 2020;
6. E compania ta registra na Departamento di Impuesto y tin un persoonsnummer;
7. E compania ta cumpliendo cu pago di impuesto y primanan social pa tur luna cu a y ta aplica pa subsidio;
8. E compania mester aplica pa e subsidio;
9. E compania a cumbini cu tur trahado un reduccion di arbeidsomvang cu por varia entre 0% te cu maximal 40%.
Pa por aplica pa subsidio di salario pa luna di october e dunado di trabou mester a cumpli cu e pago di tur belasting (BBO y loonbelasting) como tambe prima y seguro social pa luna di mei 2020 te cu september 2021. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di e dunado di trabou pa cumpli cu e pagonan aki. Si e dunado di trabou no ta paga esakinan e por afecta e otorgamento di subsidio di salario. SVb ta controla tur dunado di trabou pa sigura cu ta cumpli.
Comparacion di perdida di entrada di benta
E comparacion di entrada di benta pa yega na e % di perdida di entrada di benta cu ta premira pa luna di september 2021 mester ta e comparacion entre e entrada di benta di luna di october 2019 y loke ta premira di bay tin na entrada di benta pa luna di october 2021.
SVb un biaha mas ta pidi tur dunado di trabou pa tuma nan tempo y lesa e notificacion y specialmente e checklist bon prome cu bay aplica, pa evita cu ta entrega cos robes of incompleto. Despues di a entrega e aplicacion e dunado di trabou no por haci cambio mas.
Tambe ta sumamente importante pa e dunado di trabou verifica y sigura su mes cu e ta entrega su aplicacion door di click ariba Entrega aplicacion. Si e aplicacion keda entrega, e status di e peticion ta bira Entrega. Si e status ta Peticion Nobo, e aplicacion NO a keda entrega.
Pago di subsidio di salario pa luna di october di parti di SVb pa e dunado di trabou ta wordo ehecuta despues cu SVb ehecuta tur control. Dunado di trabou ta responsabel pa verifica cu su cuenta di banco y tur salario di su trahadonan ta corectamente registra na SVb.
NOTA ADICIONAL PA TENE NA CUENTA
SVb ta recorda tur dunado di trabou cu ta indispensabel pa entrega e declaracion di entrada mediante e declaracion di BBO y entrega esaki corectamente pa evita eror den calculacion di e perdida di entrada. Si na momento cu SVb haci e control di e perdida di entrada keda constata cu no a haci declaracion di BBO pa e luna cual a ricibi subsidio di salario, SVb lo tin cu vorder bek e suma completo cu a ricibi na subsidio di salario pa e luna en cuestion.
Bo tin pregunta?
Mail nos Service Center na loonsubsidie@svbaruba.org.
Bo kier lesa mas tocante e programa di Subsidio di Salario?
Habri https://www.svbaruba.org/subsidio-di-salario/.
Denuncia Abuso Subsidio di Salario
Subsidio di Salario ta un areglo unda e empresa cu ta sufri perdidia di mas cu 25% pa motibo di covid-19 ta bin na remarka pa ricibi ayudo financiero den forma di un subsidio. Por lesa mas di e Subsidio di Salario akinan: https://www.svbaruba.org/subsidio-di-salario/
E Subsidio di Salario ta un ayudo cual ta wordo paga na e dunador di trabao, pa e dunador di trabao por sigui paga su trahado(nan). Den caso cu dunador di trabou no por paga su parti di salario e dunador di trabao mester jega na un acuerdo cu su trahado riba e resto (40% of menos, depende di e perdida anticipa) di salario trahando menos ora (‘arbeidstijdverkorting’). Pues punto di bista ta cu trahado ta traha e candidad di ora segun e salario cu e ta ricibi, a menos cu partidonan a cumbini algo otro.
Den caso cu ta ricibi Subsidio di Salario e trahado tin diferente derecho cual e dunador di trabao mester cumpli:
E trahado mester cobra su salario manera cu el a yega na e acuerdo cu e doño di trabao.
E salario no por ta menos cu 60% (bruto) di e salario prome cu pandemia.
E dunador di trabao mester cumpli cu pago di tur prima social y impuesto di e salario.
E trahado tin derecho pa wak ki suma su doño di trabao a ricibi di SVb pa paga su subsidio di salario. Tur dunado di trabao cu ta ricibi Subsidio di Salario ta ricibi e documento aki.
SVb ta urgi tur persona cu sa of cu ta sospecha cu tin violacion di e condicionnan aki pa raporta esaki via supervision@svbaruba.org. Si ta desea di haci esaki anonimamente por yena e formulario riba nos website: https://www.svbaruba.org/emailadres/comunica-cu-nos/formulario-di-keho/
Empresanan tin e obligacion di cumpli cu e condicionnan di e Subsidio di Salario.
Denuncia Abuso Subsidio di Salario
Vacatura Dokter di Control
Arts Oct 2021
Banco di Seguro Social Aruba (SVb) ta encarga cu ehecucion di nos leynan riba tereno di incapacidad laboral den sector publico y sector priva. SVb ta controla su clientenan pa determina nan capacidad pa traha y ta crea oportunidadnan pa e cliente por reanuda su trabao. SVb ta guia su clientenan riba e caminda di reintegracion y hunto cu su clientenan ta desaroya diferente programa di reintegracion.
Nos team di Labor & Salud ta duna servicio na tur trahado di Aruba. Ideanan di inovacion, eficiencia y progreso ta ser cultiva diariamente na SVb pa hiba nos mes y nos organisacion pa dilanti.
Pa logra e metanan aki nos ta buscando e siguiente candidato pa join nos team di Labor & Salud:
Dokter di Control
cu ta desea di contribui na nos organisacion den un forma positivo. Si bo persona tin un diploma di dokter manera ta estableci den Aru-BIG y preferiblemente tin experiencia den area di arbeid en gezondheid; bo persona tin un abilidad amplio pa comunica y banda di Papiamento bo ta domina Hulandes, Spaño y Ingles; bo ta cordialmente invita pa solicita.
Nos ta ofrece:
Salario conforme e Bezoldigingsregeling Ambtenaren y ta depende di e nivel di educacion y experiencia. Ademas nos ta ofrece bon condicionnan laboral secundario, entre otro areglo di pensioen di APFA.
Solicitacion:
Un carta di motivacion, acompaña pa CV, copia di diploma y certificado por wordo dirigi na director di SVb ir. Edwin M. Jacobs, solamente via e-mail na
info@svbaruba.org te cu 5 di november 2021.
Pa mas informacion tocante e vacatura por tuma contacto cu dr. Marleen de Graaf (mdgraaf@svbaruba.org) of dr. Myron Genser (mrjgenser@svbaruba.org).
Explicitamente Arubianonan ta wordo pidi pa solicita. Evaluacion psicologico ta parti di e proceso di solicitud.
Subsidio di Salario – September 2021
Awe, dialuna 27 di september, ta e ultimo dia cu por aplica pa subsidio di salario pa luna di september
Como dunado di trabou bo tin te fin di dia (11:59 pm) pa entrega bo aplicacion. Un dunado di trabou cu ta aplica pa subsidio di salario pa luna di september mester a cumpli cu e pago di tur prima y seguro social pa lunanan di mei 2021 te cu augustus 2021. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di un dunado di trabou pa paga e primanan aki.
Tambe tur dunado di trabou mester percura pa den nan MiSVb tin e salarionan real di nan trahadonan registra. SVb ta controla esaki y si e dunado di trabou no tin e salario real registra e por afecta e pago di subsidio di salario.
TENE NA CUENTA CU E TA E RESPONSABILIDAD DI E DUNADO DI TRABOU PA CONTROLA E INFORMACION DI APLICACION Y NO DI E TRAHADO. EN CASO CU DUNADO DI TRABOU ENTREGA UN PETICION CU NO TA CORECTO Y/OF CU FALTA INFORMACION ESAKI TA CONDUCI NA RECHASO DI E PETICION PA SUBSIDIO DI SALARIO. VERIFICA TUR DOCUMENTO Y FORMULARIO PROME CU ENTREGA!
Si bo tin pregunta, nos service center digital tey pa asisti bo. Mail nan na loonsubsidie@svbaruba.org.