Conexion di Funeraria riba MiPensioen di SVb
Banco di Seguro Social Aruba SVb tin un otro primicia unda cu entrante prome di september 2019 tur funeraria na Aruba por maneha nan propio cuenta via e portal di SVb MiPensioen.
Funerarianan ta duna servicio na famia di pensionadonan cu fayece kende mester atende cu entiero den momento di tristesa. Parti di e servicio ta tramita peticion pa gasto di entiero na SVb.
Cu introduccion di e portal aki agencianan funeral lo tin e facilidad di entrega nan peticion pa gasto di entiero den forma digital. Esaki ta acelera e proceso, ta mas eficiente y transparente, compara cu entrega di documento den e forma tradicional. Ademas e agencianan tin e posibilidad pa controla caso pa caso con leu nan peticionnan pa gasto di entiero ta.
Otro facilidad di e portal ta cu ora SVb procesa e pagonan mensual pa gasto di entiero esaki ta aparece riba e portal y e funeraria por mira cua ta e casonan cu a wordo paga. Asina cu e pagonan ta procesa y completa esaki lo ta disponibel riba e portal.
Asina SVb ta sigui inova y ta sigui mehora su servicio pa su clientenan, partnernan y comunidad di Aruba. Pa SVb ta un placer pa por mehora su servicio na bienestar di e funerarianan y nan clientenan.
Vacatura ICT Medewerker
Banco di Seguro Social Aruba SVb ta un organisacion cual ta sigura tur ciudadano di Aruba pa perdida di entrada. Nos 70.000+ clientenan tin derecho riba un servicio facil, rapido y excelente. Un di nos metanan principal ta pa digitalisa tur servicio di SVb den e proximo añanan. Nos ta colabora cu partnernan nacional y internacional pa sigui e caminda aki y asina yega na un servicio sigur, rapido y facil pa nos clientenan.
Nos team di ICT ta duna servicio na henter SVb y na nos partnernan. Ideanan di inovacion, eficiencia y progreso ta ser cultiva diariamente na SVb pa hiba nos mes y nos organisacion pa dilanti.
Pa logra e metanan aki nos ta buscando e siguiente candidato pa join nos team di ICT:
ICT Medewerker Systeem- en Applicatie beheerder
Responsabilidadnan entre otro ta:
• Control riba funcionamento corecto di aplicacionnan, datafiles y sistemanan di datamanagement, investigacion riba fayonan tecnico y posibel solucion.
• Supervision di uzo corecto y eficiente riba tur sistema di ICT, ademas señala y raporta puntonan di atencion.
• Salvaguardia e infrastructura di ICT pa carga su peso y haci proposicion pa ahusta e capacidad a base di pronosticacion di uzo.
• Soluciona posibel problemanan relaciona cu ICT.
• Planifica mantencion y reemplazo di sistemanan di ICT.
Rekisitonan:
• HBO-opleiding di informatica of experiencia similar.
• Conocimento profundo di aplicacion y sistema di databasemanagement di Windows Server 2008R2 (y siguientenan), Windows 7 (y siguientenan), MicrosoftSQL Database, Microsoft Office 2013 (y siguientenan) Citrix XenDesktop Enviroment y VMware Enviroment.
• Por lo menos 3 aña di experiencia cu responsabilidad similar.
• Tin bon dominio di Hulandes, Ingles y Papiamento verbal y por escrito.
• Por traha independiente y den team.
Nos ta ofrece:
Salario conforme e Bezoldigingsregeling Ambtenaren y ta depende di e nivel di educacion y experiencia. Ademas bon condicionnan laboral secundario, entre otro pensioen di APFA.
Solicitacion:
Un carta di motivacion, acompaña pa CV, copia di diploma y certificado por wordo dirigi na director di SVb sr. ir. Edwin M. Jacobs, solamente mediante e-mail na info@svbaruba.org te cu 20 di september 2019.
Pa mas informacion tocante e vacatura por e-mail sr. Johan Vrieswijk (jgjvrieswijk@svbaruba.org) of sr. Gilbert Kelly (gkelly@svbaruba.org).
Pago di Pensioen September 2019
Banco di Seguro Social Aruba SVb ta informa cu pa motibonan di fayo tecnico nos lo paga pensioen di AOV y AWW awemainta ainda pero mas lat di cual ta custuma. E pagonan lo wordo haci en todo caso prome cu awemerdia.
Nos ta ofrece nos disculpa pa cualkier inconveniencia.
Entrego di Dos Tesis di SVb na Minister
Diamars merdia director di Banco di Seguro Social di Aruba SVb, sr. ir. Edwin Jacobs, acompaña pa sra. drs. Celina Tromp, funcionario di maneho di SVb, a realisa un bishita na Minister sr. Dangui Oduber, kende ta e minister encarga cu seguridad social di nos pais. Durante e bishita tanto sra. Tromp como sr. Jacobs a haci entrega di nan tesis, cual recien ambos a defende cu exito na Universidad di Buenos Aires y asina a termina nan maestria den Gestion Actuarial para la Seguridad Social. Sra. Tromp su tesis tin como enfoke central e seguronan di malesa y accidente, mientras sr. Jacobs su estudio tabata dirigi riba e seguro di gastonan medico, AZV.
Durante e encuentro, sr. Jacobs a informa Minister Dangui Oduber di e importancia di e estudio na nivel di master aki pa e trabaonan na SVb y a mustra cu e estudio a permiti e dos trahadornan di SVb amplia y profundisa nan conocemento teoretico di ciencia actuarial. Esaki sigur ta contribui na mas profesionalisacion di e trabaonan di SVb. Cu e trabaonan di tesis, e estudio a permiti traha tambe na nivel di seguridad social. Seguridad Social na Aruba ta inclui e seguronan cu SVb ta administra mas e seguro di AZV. Sr. Jacobs a mustra su gratitud na Organo Ehecutivo di AZV cu a duna tur cooperacion pa a ricibi e datonan necesario pa asina por a realisa e proyeccionnan di gasto di AZV.
Sr. Jacobs ta indica cu a pone un paso importante pa monitoreo di desaroyonan riba seguridad social y SVb lo busca e cooperacion cu AZV pa por sigui haci e trabao aki di monitoreo ariba termino di 15 pa 20 aña.
Di su banda Minister Dangui Oduber a felicita tanto sra. Tromp como sr. Jacobs y a deseanan exito den trabao na beneficio di nos comunidad.
Jaaropgaaf Pensioen 2018
Banco di Seguro Social Aruba SVb ta informa cu e jaaropgaaf di AOV/AWW 2018, cual ta necesario pa e declaracion di inkomstenbelasting 2018, ta ser manda mediante post pa tur pensionado di SVb. E carta di jaaropgaaf lo ser ricibi entrante 15 juli 2019 y despues. Clientenan cu a indica cu ta preferea di ricibi esaki mediante nan email lo ricibi esaki riba nan email cual ta registra den e sistema di MiPensioen.
Ademas semper por download y print e jaaropgaaf aki riba nos website riba e portal di MiPensioen: https://pensioenen.svbaruba.org. Mas informacion por wak riba nos portal di pensioen: https://www.svbaruba.org/pensioen/.
Relato Anual di SVb 2018
E relato anual di SVb su fondonan pa aña 2018 a keda cla. Nos accountant a entrega na SVb e cuentanan anual oficialmente y esaki a wordo entrega na Minister di Turismo, Salud Publico y Deporte, den cumplimento di articulo 16, inciso 2 di nos ley di Banco di Seguro Social.
Esaki ta prome relato anual cu SVb ta entrega den forma digital ademas ta uniforma den 1 solo documento.
Por wak e relato anual akinan (PDF document):
Esnan di añanan anterior tambe ta disponibel pa wak y baha riba nos pagina di cuentanan anual:
Ceramento oficinanan di SVb
En conexion cu Dia di Ascension tur oficina di SVb ta cera pa publico riba e proximo dos dianan:
• Diahuebs 30 mei 2019
• Diabierna 31 mei 2019
Riba e dianan aki por notifica AO mediante nos website: www.svbaruba.org/ao. Notificacion di AO na telefon 527-2782 riba e dianan aki ta limita na e siguiente orario 7:00 AM pa 11:00 AM.
E ceramento no ta afecta e sistemanan riba nos website.
Relato Anual SVb entrega na Minister Dangui Oduber
Awe merdia director di Banco di Seguro Social Aruba SVb ir. Edwin M. Jacobs, den presencia di Hoofd Financien Javier Rasmijn a entrega e Relato Anual na Minister Dangui Oduber. Simbolisando e transicion cu e organisacion di SVb ta pasando aden, director a entrega e Relato Anual den forma digital.
Minister Dangui Oduber a expresa su satisfaccion pa e hecho cu SVb a cumpli cabalmente cu articulo 16 inciso 2 di e ley di SVb, ademas a expresa cu ta satisfecho cu e resultadonan obteni.
Entrante dialuna 3 di juni e Relato Anual ta disponibel riba nos website:
https://www.svbaruba.org/organisacion/jaarrekening-svb/ .
Email cu Resumen Debe y Credito SVb
Diasabra 11 di mei 2019 SVb a cuminsa e proceso pa manda un resumen di debe y credito na tur doño di trabao registra na SVb. Tur doño di trabao di cual SVb tin un email a ricibi (algun) di e documentonan aki:
– Cuenta(nan) habri di premie Seguro di Malesa y Accident (ZV/OV);
– Debiteurenkaart y Crediteurenkaart (ZV/OV);
– Resumen di Cessantia, Boet y/of Pago pendiente.
Doñonan di trabao asina ta ser informa di e estado di nan cuentanan riba e documentonan aki. Ademas si tin cualkeir pregunta riba esaki por tuma contacto cu SVb manera ta menciona den e email, of por email nos na info@svbaruba.org.
Ta posibel cu un doño di trabao no a ricibi e email aki di SVb. Na prome instante nos ta conseha pa wak si e email di SVb no por a wordo clasifica como ‘spam’ of ‘junk’, y asina no ta aparece den e ‘inbox’. Ademas ta posibel cu nos tin un emailadres registra cu no ta corecto of cu no ta wordo usa mas. Den e caso aki nos ta pidi pa tuma contacto cu nos pa nos por registra e email corecto.
Cu e servicio aki SVb ta sigui riba e caminda pa duna nos clientenan mas servicio digitalisa. Ademas dentro di poco nos lo ta bay ofrece tur e informacionnan aki riba nos website, unda tur doño di trabao lo por subi nos website y log in na un manera sigura y safe pa haya nan mesun informacion.
Durante Proximo Weekend Callcenter di SVb ta cera
Banco di Seguro Social Aruba SVb ta anuncia cu en conexion cu trabaonan di mantencion, su callcenter pa notifica AO (527-2782) ta cera riba diasabra 27 y diadomingo 28 di april 2019.
Notificacion di AO (meld ziek) mediante telefon 527-2782 riba e dianan aki no ta posibel.
Por haci uso di nos formulario pa Notifica AO online: www.svbaruba.org/ao. E formulario aki ta habri tur dia entre 7:00 AM y 4:00 PM.
Dialuna 29 april 2019 e Callcenter ta habri atrobe na e orario normal, cual ta entre 7:00 AM y 4:00 PM.
E sistema di Webportaal di SVb no lo ser afecta pa e ceramento di e callcenter.
Nos ta ofrece nos disculpa pa e inconveniencia aki.