Peticion Sosten Financiero
Entrante awe merdia 4:00 PM e formulario pa entrega e peticion pa por ricibi e Sosten Financiero ta disponibel riba nos portal di MiSVb (https://misvb.svbaruba.org).
Tur compania cu ta cualifica pa ricibi e Sosten Financiero pa empresanan mediano y chikito y cu a ricibi un email di informacion di SVb, por subi nos portal y yena e peticion. Pa e di dos pago aki tin un cambio grandi cual ta cu mester aplica pa esaki den MiSVb. Tur compania cu a haya un notificacion cu por aplica pa Sosten Financiero tin te dia 27 di juli 2020 pa haci esaki pa e di dos pago di e Sosten Financiero.
Den caso cu e compania tin pregunta pa cu e Sosten Financiero por manda un e-mail pa helpdeskmkb@svbaruba.org.
Den caso cu no ta bin na remarca pa ricibi e Sosten Financiero por manda un obhecion na bezwaarnoodplanregeling@svbaruba.org. Den e obhecion mester pone e nomber y SVb-code di e compania como tambe un motivacion pakico e compania ta di opinion cu e compania ta bin na remarke. Obhecionnan cu no ta completo, no ta wordo trata.
Pa mas informacion riba e Sosten Financiero por wak riba e pagina akibao:
https://www.svbaruba.org/sosten-financiero/
Sosten Financiero pa Empresa Chikito y Mediano
Recien Gobierno di Aruba a anuncia e Sosten Financiero pa Empresa Chikito y Mediano (Sosten Financiero) cu ta e ayudo pa empresanan chikito y mediano. E ayudo aki ta bin den forma di un sosten financiero di Afl. 4000,- pa kwartaal si ta cumpli cu tur rekisito. E suma ta pa yuda cubri e gastonan operacional di compania chikito y mediano.
Pa ricibi e sosten financiero pa empresa chikito y mediano mester cumpli cu e siguiente rekisitonan:
- E compania ta registra na SVb cu un minimo di 1 y maximo di 50 empleado;
- Tur empleado mester ta registra cerca SVb riba 15 maart 2020;
- E compania ta registra na Camara di Comercio riba 15 maart 2020 (cu excepcion pa esnan cu no tin obligacion legal di ta registra);
- E compania ta registra na Departamento di Impuesto riba 15 maart 2020 y tin un persoonsnummer;
- E compania a cumpli cu declaracion di BBO pa luna di april, mei y juni, 2020;
- E compania ta spera perdida di entrada di benta di por lo menos 25% pa e lunanan juli, augustus y september, 2020;
- E compania ta estableci fisicamente na Aruba;
- E compania no ta failliet;
- E compania no tin peticion pa suspencion di pago na Corte di Husticia;
- E ayudo di Afl 4.000,- no ta parti di e benta di e compania.
E prome pago di e Sosten Financiero a tuma luga riba 29 april, 2020 mediante SVb. E pago a bay automaticamente pa tur compania cu a cumpli cu e rekisitonan di e programa di Sosten Financiero. E pago aki tabata pa luna di april, mei y juni, 2020.
E di dos pago di e Sosten Financiero ta pa luna di juli, augustus y september, 2020. Pa e di dos pago tin un cambio grandi. E compania cu ta bin na remarke pa e Sosten Financiero mester aplica pa esaki den su MiSVb. Tur compania cu a haya un notificacion cu por aplica pa Sosten Financiero tin te dia 27 di juli, 2020 pa haci esaki pa e di dos pago di e Sosten Financiero.
Den caso cu e compania tin pregunta pa cu e Sosten Financiero por manda un e-mail pa helpdeskmkb@svbaruba.org.
Den caso cu no ta bin na remarca pa ricibi e Sosten Financiero por manda un obhecion na bezwaarnoodplanregeling@svbaruba.org. Den e obhecion mester pone e nomber y SVb-code di e compania como tambe un motivacion pakico e compania ta di opinion cu e compania ta bin na remarke. Obhecionnan cu no ta completo, no ta wordo trata.
Por Aplica pa Subsidio di Salario Entrante 20 juli
SVb ta anuncia cu e periodo pa aplicacion pa subsidio di salario pa luna di juli ta cuminsa dialuna awor, dia 20 di juli, 2020. Tur dunado di trabou cu ta bin na remarke pa aplica pa subsidio di salario ta ricibi un notificacion di SVb y despues di ricibi esaki nan por yena nan aplicacion den nan portal digital MiSVb. Ultimo dia pa aplica pa subsidio di salario pa luna di juli ta 26 di juli, 2020, fin di dia.
Tur rekisito pa subsidio di salario a keda mescos pa luna di juli:
- E compania a wordo afecta den un forma negativo pa motibo di COVID-19;
- E compania tin un perdida di entrada premira di por lo menos 25% den e luna di e subsidio;
- E compania no ta permiti pa retira empleado pa motibonan socio-economico;
- E compania ta paga e empleado minimal 60% di su salario;
- E compania y tur empleado ta registra na SVb riba 15 di maart 2020;
- E compania ta registra na Departamento di Impuesto y tin un persoonsnummer;
- E compania ta cumpli cu pago di impuesto y primanan social di e luna corespondiente cu a aplica pa subsidio;
- E compania mester aplica pa e subsidio;
- E compania a cumbini cu tur trahado un reduccion di arbeidsomvang cu por varia entre 0% te cu maximal 40%.
SVb ta recorda tur dunado di trabou cu pa aplica pa subsidio di salario pa luna di juli e dunado di trabou mester a cumpli cu e pago di tur prima y seguro social pa luna di mei y juni. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di e dunado di trabou pa paga e primanan aki.
Pa e aplicacion mes tambe tin puntonan importante pa tene na cuenta:
- E formulario pa e trahadonan firma lo ta disponibel den e portal digital MiSVb. Solamente e formulario oficial aki di SVb por wordo usa y ta wordo acepta;
- Dunado di trabou y trahado mester firma e formulario y yena e % di reduccion di arbeidsomvang cu a acorda (reduccion di min. 0% y max. 40%);
- Tur documento relaciona cu e aplicacion pa subsidio di salario mester wordo uploaded den MiSVb y den un solo documento (1 file). SVb no ta acepta documentonan via e-mail;
- Despues di a upload e formulario cu firma di e trahadonan y di e dunado di trabou, mester yena e formulario di aplicacion;
- Despues di yena e formulario di aplicacion, ta primi ariba ENTREGA PETICION;
- Dunado di trabou ta ricibi un confirmacion cu aplicacion a keda entrega;
- No por haci cambio na e peticion despues di a entrega e aplicacion asina ta cada dunado di trabou mester tuma su tempo pa yena e informacion corecto y sigura su mes cu e ta upload e formulario cu firma di e trahadonan corectamente y completo den un solo documento (1 file);
Pago di subsidio di salario pa luna di juli di parti di SVb pa e dunado di trabou lo cuminsa entrante 29 di juli, 2020. Dunado di trabou ta responsabel pa verifica cu su cuenta di banco ta corectamente registra na SVb.
Pa facilita e proceso di aplicacion y contesta pregunta di dunado di trabou y trahado relaciona cu e programa di Subsidio di Salario por tuma contacto cu e Service Center via mail na loonsubsidie@svbaruba.org, of por lesa mas akinan: https://www.svbaruba.org/subsidio-di-salario/
Video: Procedura Notifica AO Sector Priva
https://youtu.be/uEAOhO_Pk54
Pa Luna di juni SVb ta registra 1663 aplicacion pa subsidio di salario
Di un cantidad di 3200 doño di trabao cu pa luna di juni a bin na remarca pa por aplica pa e programa Subsidio di Salario, 1663 a haci uso di e oportunidad. Cu esaki por bisa cu pa luna di juni alrededor di 22.800 di trahadonan a keda cubri cu un garantia di pago parcial di nan salario pa un suma di 40.7 miyon florin.
SVb ta controlando tur e formularionan Akkoordverklaring Vermindering Arbeidsomvang cu e doño di trabao mester a yena y entrega pa e luna aki. Lo tuma contacto cu mas o menos 300 doño di trabao cu no a yena e formulario corecto of completo pa brinda nan e oportunidad pa coregi nan eror. Despues di esaki ta premira cu pa diaranson awor ta cuminsa cu e transferencia di e suma di subsidio di salario pa e doño di trabao cu tabata tin cos na ordo y ta sigui despues cu esunnan cu mester a drecha e formulario Akkoordverklaring Vermindering Arbeidsomvang.
SVb ta recorda tur doño di trabao cu e ta su responsabilidad pa percura cu su informacion bancario ta registra corectamente na SVb. Si esaki no ta e caso, e por resulta den retraso innecesario den pago di e Subsidio di Salario.
Pa facilita e doño di trabao y brinda e ayudo mas lihe posibel e Subsidio di Salario ta wordo paga den forma di un adelanto (na Hulandes un voorschot) a base di e perdida di entrada di benta premira pa e doño di trabao pa luna di mei. Despues lo controla y fiha e suma di subsidio a base di entrada di benta real di e doño di trabao pa luna di juni.
Doño di trabao cu ainda tin pregunta relaciona cu e programa Subsidio di Salario por sigui manda nan pregunta pa e Service Center na loonsubsidie@svbaruba.org.
Denuncia Abuso cu Subsidio di Salario
E meta principal di e Subsidio di Salario ta pa e trahado mantene su trabao y asina garantisa pago parcial di su salario. E subsidio di salario por wordo uza solamente pa pago di salario y su primanan social, pa cual e doño di trabao ta keda responsabel pa e pago di salario.
E trahado tin derecho pa wak ki suma su doño di trabao a ricibi di SVb pa paga su subsidio di salario.
Empresanan tin e obligacion di cumpli cu e condicionnan di e Subsidio di Salario.
Si abo sa of ta sospecha cu tin violacion di e condicionnan aki ta tumando luga, raporta esaki via supervision@svbaruba.org.
Ultimo Dia pa Aplica pa Subsidio di Salario ta 19 Juni
RECORDATORIO – SVb ta recorda tur dunado di trabou cu 19 di juni, 2020 ta ultimo dia pa aplica pa Subsidio di Salario pa juni
Tur dunado di trabou cu ta bin na remarke pa aplica pa Subsidio di Salario pa luna di juni a ricibi un notificacion di SVb dia 3 di juni ultimo. E notificacion a wordo manda automaticamente pa e e-mail cu e dunado di trabou tin registra na SVb como su e-mail (paga tino na e junk of spam folder!).
SVb ta recorda tur dunado di trabou cu e tin te cu dia 19 di juni, 2020 (fin di dia) pa aplica pa subsidio di salario pa luna di juni, 2020.
Pa luna di juni, 2020 e dunado di trabou mester sigura cu ela entrega – sea upload den MiSVb of via mail na lsflex@svbaruba.org – e formulario Akkoordverklaring Vermindering Arbeidsomvang firma pa su trahadonan como tambe yena e formulario di aplicacion pa subsidio di salario den MISVb y a click ariba entrega peticion.
Pago di subsidio di salario pa luna di juni di parti di SVb pa e dunado di trabou lo cuminsa entrante 26 di juni, 2020. Dunado di trabou ta responsabel pa verifica cu su cuenta di banco ta corectamente registra na SVb.
Pa facilita e proceso di aplicacion y contesta pregunta di dunado di trabou y trahado relaciona cu e programa di Subsidio di Salario por tuma contacto cu e Service Center via mail na loonsubsidie@svbaruba.org. Tambe por subi ariba e pagina di SVb www.svbaruba.org y bay na e topico Subsidio di Salario (na Doño di Trabou).
Cambio den Aplicacion pa Subsidio di Salario
IMPORTANTE – SVb ta notifica di un cambio den aplicacion pa Subsidio di Salario pa juni, 2020
Ultimo dia pa aplica pa Subsidio di Salario pa luna di juni ta bira 19 di juni, 2020
Tur doño di trabao cu ta bin na remarca pa aplica pa Subsidio di Salario pa luna di juni a ricibi un notificacion di SVb dia 3 di juni ultimo. E notificacion a wordo manda automaticamente pa e e-mail cu e doño di trabao tin registra na SVb como su e-mail (paga tino na e junk of spam folder!). Den e notificacion a splica e rekisito nobo cu ta aplicabel pa luna di juni. Ta trata aki di e acuerdo pa reduccion di arbeidsomvang di parti di e trahado cu minimo 20%. Den esaki a bin un cambio importante cu e doño di trabao mester tene cuenta cune.
Gobierno di Aruba a tuma e decision pa flexibilisa e condicion ariba reduccion di arbeidsomvang. E flexibilisacion aki ta encera cu e doño di trabao y trahado por yega na acuerdonan individual con ta yena e 40% ariba e 60% di subsidio di salario.
SVb ta categorisa e doño di trabao den 4 grupo:
- Doño di trabao cu a entrega peticion caba cu e formulario di reduccion di 20% y cu no ta desea flexibilisacion;
- Doño di trabao cu a entrega peticion caba cu e formulario di reduccion di 20% y cu si ta desea flexibilisacion;
- Doño di trabao cu no a entrega peticion ainda y cu no ta desea flexibilisacion;
- Doño di trabao cu no a entrega peticion ainda y cu si ta desea flexibilisacion;
Doño di trabao den e categoria 1 no mester tuma ningun accion mas y por warda e evaluacion riba e peticion.
Doño di trabao den categoria 2 mester haya un lista nobo pa nan aplica e flexibilisacion. E grupo aki tin cu manda un e-mail na lsflex@svbaruba.org y solicita un lista nobo pa nan yena. E doño di trabao ta ricibi un lista nobo y ta debolbe esaki yena y firma pa trahadonan cu ta acepta e condicion na lsflex@svbaruba.org.
Doño di trabao den categoria 3 ta sigui e procedura riba MiSVb manera stipula den e notificacion di 3 di juni ultimo.
Doño di trabao den categoria 4 tin cu manda un e-mail na lsflex@svbaruba.org y solicita un lista nobo pa nan yena. E lista nobo yena y firma e ta upload den su MiSVb na momento di completa su aplicacion pa subsidio di salario.
Pa por duna tur doño di trabao e oportunidad pa entrega nan aplicacion pa subsidio di salario pa luna di juni SVb a hala e fecha cu ta sera e aplicacion pa luna di juni. Doño di trabao tin awor te cu dia 19 di juni, 2020 (fin di dia) pa aplica pa subsidio di salario pa luna di juni, 2020.
E cambio aki pa luna di juni y e control cu SVb mester haci pa cu e declaracionnan di acuerdo cu firma di trahado tin como consecuencia cu pago di subsidio di salario pa luna di juni di parti di SVb pa e doño di trabao lo cuminsa entrante 26 di juni, 2020. Doño di trabao ta responsabel pa verifica cu su cuenta di banco ta corectamente registra na SVb.
Pa facilita e proceso di aplicacion y contesta pregunta di doño di trabao y trahado relaciona cu e programa di Subsidio di Salario por tuma contacto cu e Service Center via mail na loonsubsidie@svbaruba.org. Tambe por subi ariba e pagina di SVb www.svbaruba.org y bay na e topico Subsidio di Salario (na Doño di Trabao).
Trahado cu ta biaha pa exterior
Entrante 15 di juni 2020 un trahado cu:
- biaha pa exterior pa un pais caminda tin casonan positivo di Covid-19;
- y na su regreso wordo obliga pa bay den cuarentena;
a base di articulo 7 bao punto 1A di e Ordenansa di Seguro di Malesa lo no tin derecho riba benificio pa malesa durante e periodo cu e permanece den cuarentena.
Esaki debi cu lo considera e acto sumamente negligente di e persona cu biaha pa un pais di cual ta conoci cu tin casonan positivo di Covid-19 un culpabilidad grave (grove schuld).
Articulo 7 bou punto 1A di e Ordenansa di Seguro di Malesa ta stipula cu e trahado no tin derecho of ta perde e derecho riba benificio pa malesa (ziekengeld) si e malesa ta debi na intencion (opzet) of culpabilidad grave (grove schuld) di e trahado.
Lo haci excepcion solamente pa personanan cu wordo manda exterior pa un tratamento medico cu e aprobacion di AZV. Den caso cu ta bay afo pa ricibi tratamento por tuma contacto cu nos departamento di Administracion Medico na medisch@svbaruba.org pa mas informacion.
Entrante 4 di juni por aplica pa Subsidio di Salario
SVb a notifica e dunado di trabou cu desde 4 di juni por aplica pa Subsidio di Salario pa luna di juni
Ultimo dia pa aplica pa Subsidio di Salario pa luna di juni ta 13 di juni, 2020
Tur dunado di trabou cu ta bin na remarke pa aplica pa Subsidio di Salario pa luna di juni a ricibi un notificacion di SVb. E notificacion a wordo manda automaticamente pa e e-mail cu e dunado di trabou tin registra na SVb como su e-mail (paga tino na e junk of spam folder!). E dunado di trabou cu a ricibi e notificacion mester dirigi su mes na su portal digital MiSVb. Eynan e dunado di trabou ta ingresa e portal usando su credencial. E formulario di aplicacion pa Subsidio di Salario ta bay aparece como un opcion. E formulario mester wordo yena completamente y despues mester primi e boton “ENTREGA PETICION”. E dunado di trabou tin te dia 13 di juni, 2020 pa yena e formulario di aplicacion. E dunado di trabou mester tuma su tempo pa yena e formulario specialmente ora di premira e perdida di entrada di benta.
Subsidio di Salario ta un sosten financiero pa empresanan local cu a consecuencia di e situacion actual causa pa e pandemia COVID-19 ta sufri un perdida di entrada di benta di por lo menos 25%. E meta principal di e programa di Subsidio di Salario ta pa mantene mas trahado cu ta posibel den servicio maske cu tin menos (of no tin) actividad economico y pa garantisa pago parcial di salario.
No ta tur dunado di trabou ta bin na remarke pa ricibi Subsidio di Salario. Tin un lista di rekisito cu e dunado di trabou mester cumpli cune (por wak esaki ariba https://svbaruba.org). SVb a manda e notificacion pa aplicacion solamente pa e dunadonan di trabou cu por entrega un aplicacion pa Subsidio di Salario pa luna di juni. Pa luna di juni tin un rekisito nobo cu e dunado di trabou mester cumpli cune pa por ricibi e Subsidio di Salario. E dunado di trabou mester obtene firma di su trahadonan cu nan ta bay di acuerdo cu un reduccion di e arbeidsomvang di minimal 20%. SVb tin un formulario disponibel den e portal digital MiSVb cu e dunado di trabou mester usa. E formulario mester wordo imprimi y dunado di trabou y tur trahado mester firme. Despues e dunado di trabou mester ‘upload’ e formulario cu tur firma bek den su MiSVb. Si un trahado no kier firma pa e reduccion di e arbeidsomvang e dunado di trabou no lo ricibi Subsidio di Salario pa e trahado ey. Ta keda e ora entre e dunado di trabou y e trahado en cuestion pa yega na un areglo.
Ta importante pa menciona cu den un compania no por tin algun trahado cu ta ricibi sosten financiero por medio di FASE y pa otro trahado e dunado di trabou ta aplica pa Subsidio di Salario. Esaki no ta posibel. Tur trahado ta ricibi sosten por medio di FASE of tur trahado ta ricibi ayudo por medio di Subsidio di Salario via su dunado di trabou.
Pa facilita e dunado di trabou y brinda e ayudo mas lihe posibel e Subsidio di Salario pa luna di juni ta wordo paga den forma di un adelanto (na Hulandes un voorschot) a base di e perdida di entrada di benta premira pa e dunado di trabou pa luna di juni 2020 compara cu su entrada di benta realisa na juni 2019. E dunado di trabou ta bay premira (schat) cuanto e ta bay tin na entrada di benta den luna di juni 2020. E diferencia entre juni 2019 y juni 2020 den porcentahe ta bira e dunado di trabou su perdida di entrada di benta premira cu mester yena ariba e formulario di aplicacion.
SVb kier recorda tur dunado di trabou cu ta hopi importante pa e dunado di trabou mantene tur su informacion di contacto, salario di trahadonan como tambe su cuenta bancario semper corecto den sistema di SVb. Durante e prome tanda di aplicacion SVb a constata cu varios dunado di trabou tin informacion incorecto registra y esaki por tin consequencia indesea pa e dunado di trabou.
Pa facilita e proceso di aplicacion y contesta pregunta di dunado di trabou y trahado relaciona cu e programa di Subsidio di Salario tin un Service Center. Por tuma contacto cu e Service Center via mail na loonsubsidie@svbaruba.org. Tambe por subi ariba e pagina di SVb www.svbaruba.org y bay na e topico Subsidio di Salario (na Doño di Trabou).