Seguro di Malesa

Kico ta e seguro di malesa?

E seguro di malesa ta percura pa un trahado haya parti di su salario den caso cu e no por traha pa motibo di malesa. Un malesa ta un situacion durante 24 ora of mas den cual un trahado no ta capacita pa haci su trabao.

Cual trahadonan ta cay bao e seguro di malesa?

E trahado den servicio cu ta ricibi un salario di Afl. 5.850,- of menos pa luna ta cay bao e seguro di malesa.

E siguiente categorianan di trahado no ta cay bao e seguro di malesa:

• E doño di trabao y/of su casa cu ta traha pa su propio riesgo y cu ta ricibi pago.
• E yui(nan) of mayor(nan) di un doño di trabao cu ta traha den su propio compania y cu no ta ricibi pago of cu ta ricibi pago bao nivel di sueldo minimo.
• Personal domestico.
• Capitan of navegante riba barco bao bandera di Aruba.
• Empleadonan publico of empleadonan cual nan status legal ta igual na empleadonan publico.
• Trahadonan cu ta traha na cas.

Cuanto e compensacion ta pa dianan di AO?

E asegurado tin derecho riba compensacion igual na 80% di su salario entrante e di cuater dia desde e notificacion di AO. SVb no ta paga compensacion pa e prome tres dianan di AO.

Pa cuanto tempo e trahado por haya compensacion?

Tur trahado tin derecho riba compensacion durante no mas cu dos aña pa e mesun causa di malesa. Ta cuminsa conta e periodo di 2 aña riba e dia cu e trahado notifica AO na SVb pa prome biaha cu e malesa en cuestion.

Cu cual rekisitonan e trahado mester cumpli pa por ricibi compensacion?

Pa e trahado por ricibi compensacion e mester cumpli cu e siguiente rekisitonan:

• • E trahado mester ta inscribi na SVb.
  • E trahado no tabata tin e malesa pa cual e ta notifica AO prome cu ela drenta den servicio.
  • E trahado mester cumpli cu tur reglanan di notifica AO.

E trahado cu a haya un malesa a consecuencia di un conducta prohibi, un acto intencional of descuido serio di e trahado, no por bin na remarca pa ricibi compensacion.

Con ta ricibi compensacion di SVb?

SVb ta duna compensacion pa seguro di malesa y accident despues cu a ricibi peticion pa cu esaki via e portal di MiSVb. Peticionnan pa pago di ZUK cu a ser entrega prome cu dia 20 di e luna coriente, ta wordo paga riba dia 5 di e siguiente luna.

Compensacion pa verlof di parto

Trahadonan femenino tin derecho riba compensacion di salario pa e dianan di verlof prome y despues di parto. Durante e verlof di parto e trahado femenino tin derecho riba un compensacion igual na 100% di su salario.
SVb ta compensa un verlof di maximo 12 siman. E trahado por parti e verlof entre 4 te 6 siman prome cu e parto, y e resto di e 12 siman despues di parto.
Pa bin na remarca pa compensacion e trahado femenino ta notifica SVb tres luna prome di e fecha stipula pa parto.

Cuanto e prima ta pa e seguro di malesa?

SVb ta cobra un suma igual na 2.65% di e salario bruto di trahado pa e seguro di malesa. E prima aki ta keda contribui door di e doño di trabao.
Ta contra ley pa e trahado paga e prima, of pa e suma wordo reduci for di su salario.

Fayecimento di Asegurado

Den caso cu un asegurado fayece, SVb ta rekiri pa wordo informa di esaki dentro di 30 dia despues di e fayecemento. Esaki pa preveni cu na prome instante primanan ta wordo cobra dimas na e empresa; tambe si tabata AO cu lo mester paga bek compensacion di ziekengeld cu a ricibi dimas.

Pa haci esaki por manda un email cu e siguiente informacion di e fayecido na medisch@svbaruba.org:

• Nomber(nan) y fam (fam di soltera) ful
• Fecha di nacemento
• Fecha di fayecemento
• Empresa(nan) unda ta inscribi
• Overlijdensakte/Certificado di defuncion

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of mediante e formulario aki.