Inscripcion pa doño di trabao

Kico ta un un doño di trabao y pakico e mester inscribi na SVb?

Un doño di trabao por ta un persona of un entidad huridico cu ta estableci na Aruba y cu tin un trahado of mas den servicio cu ta trahando na Aruba of pafo di Aruba. E doño di trabao ta sigura e trahado(nan) medio su contribucion na e fondonan di seguronan di malesa y accident. Tambe e ta contribui na e fondonan di cesantia, pensioen di biehes y pensioen di viudo y huerfano.

Ki ora mester inscribi un compania na SVb?

Un doño di trabao ta obliga pa inscribi su compania na SVb na momento cu e tuma un of mas trahado den servicio. E propietario of directeur kende ta grootaandeelhouder (tin 50% of mas di accion den Registro di Accionnan) y/of su casa no por wordo inscribi como asegurado di SVb. Esaki ta conta tambe pa e propietario of directeur y/of su casa di un eenmanszaak. Propietario of directeur y/of su casa, cu no ta grootaandeelhouder por wordo inscribi na SVb solamente si nan ta ricibi salario.

Ki ora e doño di trabao mester contribui na e fondonan di seguronan social?

Ley ta stipula cu e doño di trabao mester contribui prima di seguronan social desde cu a tuma un of mas trahado den servicio. Den caso cu e doño di trabao a inscribi despues di a tuma trahado den servicio, e obligacion ta keda pa contribui na e fondonan desde e fecha cu a tuma un trahado of mas den servicio, y no desde e fecha di inscripcion.

Na unda e doño di trabao por inscribi su compania?

Inscripcion y/of cambio di compania por wordo haci riba e portal MiSVb 2.0: https://misvb.svbaruba.org.

Documentonan rekiri pa inscribi un Eenmanszaak:

• Uittreksel di Kamer van Koophandel.
• Nomber di banco y e number di cuenta.
• Identificacion valido (paspoort, rijbewijs of cedula) di tur trahado den servicio.

Documentonan rekiri pa inscribi un NV, VBA, BV of AVV:

• Statuut.
• Uittreksel di Kamer van Koophandel.
• Nomber di banco y e number di cuenta.
• Beschikking di Ministerio di Finansas y Asunto Economico tocante e permiso di establecimento.
• Registro di Accionnan.
• Identificacion valido (paspoort, rijbewijs of cedula) di tur trahado den servicio.

Documentonan rekiri pa inscribi un CV, VoF of Maatschap:

• Statuut, Akte van Oprichting of Overeenkomst.
• Uittreksel di Kamer van Koophandel.
• Nomber di banco y e number di cuenta.
• Identificacion valido (paspoort, rijbewijs of cedula) di tur trahado den servicio.

Documentonan rekiri pa inscribi un Stichting of Vereniging:

• Statuut.
• Uittreksel di Kamer van Koophandel.
• Nomber di banco y e number di cuenta.
• Beschikking di Ministerio di Finansas y Asunto Economico tocante e permiso di establecimento (Den caso cu ta aplicabel).
• Identificacion valido (paspoort, rijbewijs of cedula) di tur trahado den servicio.

Inscripcion pa trahado

E doño di trabao ta obliga pa registra e trahado na SVb prome cu e cuminsa traha of riba e prome dia di trabao.
Ora un trahado drenta den servicio di un doño di trabao, e doño di trabao mester registra e trahado riba e portal di MiSVb 2.0. E doño di trabao ta cuminsa paga prima pa e trahado nobo desde e fecha cu e ta drenta den servicio.

Con e trahado por haci su inscripcion?

E trahado mes no por haci su inscripcion na SVb. Solamente e doño di trabao por haci esaki mediante nos portal di MiSVb 2.0.

Cambionan den situacion laboral

Ora tin cambionan den situacion di un trahado e doño di trabao mester notifica SVb di esaki. Esaki ta conta pa entre otro:

• Na momento cu un trahado nobo drenta den servicio.
• Na momento cu tin un cambio di e estado civil di e trahado.
• Na momento cu tin un aumento di salario di e trahado.
• Na momento cu tin un cambio di adres di e trahado.
• Na momento cu tin un cambio di funcion di e trahado.
• Na momento cu un trahado sali for di servicio.

Doño di trabao cu no ta inscribi of coopera cu SVb

For di momento cu un trahado drenta den servicio di un doño di trabao, e doño di trabao tin e obligacion di coopera cu e trahado pa e ta sigura pa e seguronan di SVb. E obligacion pa ta sigura no ta depende di periodo di prueba, duracion di e trabao ni di e cantidad di oranan di trabao (part-time).

Terminacion di seguro

E trahado su derecho riba beneficionan ta termina na momento cu e trahado no ta den servicio mas. E doño di trabao por haci esaki mediante e portal MiSVb 2.0. E doño di trabao debe e primanan pa e trahado te cu e fecha cu e trahado a sali for di servicio.

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of mediante e formulario aki.