Subsidio di Salario – Augustus 2020

Entrante 21 di augustus por aplica pa subsidio di salario pa luna di augustus, 2020

SVb ta anuncia cu e periodo pa aplicacion pa subsidio di salario pa luna di augustus ta cuminsa diabierna 21 di augustus 2020. Tur dunado di trabou cu ta bin na remarke pa aplica pa subsidio di salario a ricibi un notificacion di SVb y entrante 21 di augustus pa 8 ‘or di mainta por yena nan aplicacion den nan portal digital MiSVb.

Ultimo dia pa aplica pa subsidio di salario pa luna di augustus ta 27 di augustus, 2020, fin di dia (11:59 PM).

Tur rekisito pa subsidio di salario a keda mescos pa luna di augustus:

1. E compania a wordo afecta den un forma negativo pa motibo di COVID-19;
2. E compania tin un perdida di entrada premira di por lo menos 25% den e luna di e subsidio;
3. E compania no ta permiti pa retira empleado pa motibonan socio-economico;
4. E compania ta paga e empleado minimal 60% di su salario;
5. E compania y tur empleado ta registra na SVb riba 15 di maart 2020;
6. E compania ta registra na Departamento di Impuesto y tin un persoonsnummer;
7. E compania ta cumpli cu pago di impuesto y primanan social di e luna corespondiente cu a aplica pa subsidio;
8. E compania mester aplica pa e subsidio;
9. E compania a cumbini cu tur trahado un reduccion di arbeidsomvang cu por varia entre 0% te cu maximal 40%.

SVb ta recorda tur dunado di trabou cu pa aplica pa subsidio di salario pa luna di augustus e dunado di trabou mester a cumpli cu e pago di tur prima y seguro social pa luna di mei, juni y juli 2020. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di e dunado di trabou pa paga e primanan aki.

Mirando cu ainda tin dunado di trabou cu tin dificultad pa aplica pa subsidio di salario pa luna di augustus SVb ta manda un splicacion paso pa paso pa tur dunado di trabou pa asisti nan cu e proceso di aplicacion. SVb ta pidi tur dunado di trabou pa tuma nan tempo y lesa tur cos bon prome cu bay aplica pa evita cu ta entrega cos robes of incompleto. Despues di a entrega e aplicacion e dunado di trabou no por haci cambio mas.

Pago di subsidio di salario pa luna di augustus di parti di SVb pa e dunado di trabou lo cuminsa entrante 31 di augustus, 2020. Dunado di trabou ta responsabel pa verifica cu su cuenta di banco ta corectamente registra na SVb.

Pa facilita e proceso di aplicacion y contesta pregunta di dunado di trabou y trahado relaciona cu e programa di Subsidio di Salario por tuma contacto cu e Service Center via mail na loonsubsidie@svbaruba.org. Tambe por subi ariba e pagina di SVb www.svbaruba.org y bay na e topico Subsidio di Salario (na Doño di Trabou).