Subsidio di Salario – Februari 2021

SVb ta anuncia periodo di aplicacion pa subsidio di salario pa februari 2021

SVb ta informa cu desde diahuebs, 18 di februari, 2021 pa 9 ‘or di mainta y te cu diaranson, 24 di februari, 2021 na fin di dia (11:59 PM) por aplica pa subsidio di salario pa luna di februari. Tur dunado di trabou cu ta bin na remarke pa aplica pa subsidio di salario ta ricibi un notificacion di SVb cu informacion importante pa cu e aplicacion.

Pa luna di februari e rekisitonan cu mester cumpli cun’e ta keda mescos:

1. E compania a wordo afecta den un forma negativo pa motibo di COVID-19;
2. E compania tin un perdida di entrada premira di por lo menos 25% den e luna di e subsidio;
3. E compania no ta permiti pa retira empleado pa motibonan socio-economico;
4. E compania ta paga e empleado minimal 60% di su salario;
5. E compania y tur empleado ta registra na SVb riba 15 di maart 2020;
6. E compania ta registra na Departamento di Impuesto y tin un persoonsnummer;
7. E compania ta cumpli cu pago di impuesto y primanan social di e luna corespondiente cu a aplica pa subsidio;
8. E compania mester aplica pa e subsidio;
9. E compania a cumbini cu tur trahado un reduccion di arbeidsomvang cu por varia entre 0% te cu maximal 40%.

Pa por aplica pa subsidio di salario pa luna di februari e dunado di trabou mester a cumpli cu e pago di tur prima y seguro social pa luna di mei 2020 te cu januari, 2021. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di e dunado di trabou pa paga e primanan aki.

SVb un biaha mas ta pidi tur dunado di trabou pa tuma nan tempo y lesa e notificacion, y especialmente e checklist, bon prome cu bay aplica pa evita cu ta entrega cos robes of incompleto. Despues di a entrega e aplicacion e dunado di trabou no por haci cambio mas.

Tambe ta sumamente importante pa e dunado di trabou verifica y sigura su mes cu e ta entrega su aplicacion door di click ariba Entrega aplicacion. Si e aplicacion keda entrega, e status di e peticion ta bira Entrega. Si e status ta Peticion Nobo, e aplicacion NO a keda entrega.

Pago di subsidio di salario pa luna di februari di parti di SVb pa e dunado di trabou ta wordo ehecuta diariamente segun cu e aplicacion di e compania keda aproba. Dunado di trabou ta responsabel pa verifica cu su cuenta di banco y tur salario di su trahadonan ta corectamente registra na SVb.

NOTA ADICIONAL PA TENE NA CUENTA

SVb ta recorda tur dunado di trabou cu ta indispensabel pa entrega e declaracion di entrada mediante e declaracion di BBO y entrega esaki corectamente pa evita eror den calculacion di e perdida di entrada. Si na momento cu SVb haci e control di e perdida di entrada keda constata cu no a haci declaracion di BBO pa e luna cual a ricibi subsidio di salario, SVb lo tin cu vorder bek e suma completo cu a ricibi na subsidio di salario pa e luna en cuestion.

Bo tin pregunta?

Mail nos Service Center na loonsubsidie@svbaruba.org.

Bo kier lesa mas tocante e programa di Subsidio di Salario?

Por lesa mas akinan: https://www.svbaruba.org/subsidio-di-salario/.