Aplicacion Sosten Financiero (Kwartaal 1 2021)

Informacion importante pa tur dunado di trabou cu ta aplica pa Sosten Financiero pa Empresa Chikito y Mediano pa e prome kwartaal di 2021

Manera ya caba a keda anuncia, empresanan chikito y mediano cu ta bin na remarke pa aplica pa Sosten Financiero pa Empresa Chikito y Mediano (Sosten Financiero) por haci esaki desde diabierna, 15 di januari, 2021 pa 9‘or di mainta te cu diaranson, 20 di januari, 2021 na fin di dia.

E pago di e Sosten Financiero no ta bay automaticamente y si no aplica, no ta ricibi e sosten financiero.

Pa por tin derecho ariba e Sosten Financiero, e compania mester cumpli cu e siguente rekisitonan:

1. E compania ta registra na SVb cu un minimo di 1 y maximo di 50 empleado;
2. Tur empleado mester ta registra cerca SVb riba 15 maart 2020;
3. E compania ta registra na Camara di Comercio riba 15 maart 2020 (cu excepcion pa esnan cu no tin obligacion legal di ta registra);
4. E compania ta registra na Departamento di Impuesto riba 15 maart 2020 y tin un persoonsnummer;
5. E compania a cumpli cu declaracion di BBO pa lunanan di april te cu december, 2020;
6. E compania ta spera perdida di entrada di benta di por lo menos 25% pa lunanan januari, februari y maart 2021;
7. E compania ta estableci fisicamente na Aruba;
8. E compania no ta failliet;
9. E compania no tin peticion pa suspencion di pago na Corte di Husticia;
10. E ayudo di Afl 4.000,- no ta parti di e benta di e compania.

E formulario di aplicacion ta disponibel den e portal digital MiSVb di e compania. E compania ta drenta den su MiSVb cu su credencial y ta busca e formulario. Ta yena esaki completo y primi ariba ENTREGA PETICION. No por haci cambio despues di entrega e peticion y ta 1 oportunidad so tin pa aplica.

E ta SVb su meta pa ehecuta e pago di Sosten Financiero pa 21 di januari, 2021.

Pa facilita e proceso di aplicacion y contesta pregunta di empresa chikito y mediano relaciona cu e programa di Sosten Financiero por tuma contacto cu e Helpdesk via mail na helpdeskmkb@svbaruba.org. Tambe por subi ariba e pagina di SVb www.svbaruba.org y bay na e topico Sosten Financiero (na Doño di Trabou).