RECORDATORIO: Subsidio di Salario September 2020

SVb ta recorda tur dunado di trabou cu por aplica pa subsidio di salario cu e ultimo dia pa aplica pa subsidio di salario pa luna di september ta 27 di september, 2020, fin di dia.

Tur dunado di trabou cu ta aplica pa subsidio di salario pa luna di september mester a cumpli cu e pago di tur prima y seguro social pa lunanan di mei te cu augustus. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di un dunado di trabou pa paga e primanan aki. Tambe tur dunado di trabou mester percura pa den nan MiSVb tin e salarionan real di nan trahadonan registra. SVb ta controla esaki y si e dunado di trabou no tin e salario real registra e por afecta e pago di subsidio di salario.

Pa e aplicacion mes tambe tin puntonan importante pa tene na cuenta:

1. E formulario pa e trahadonan firma lo ta disponibel den MiSVb. Solamente e formulario oficial aki di SVb por usa y ta wordo acepta;
2. Dunado di trabou y trahado mester firma e formulario y yena e % di reduccion di arbeidsomvang cu a acorda (reduccion di min. 0% y max. 40%);
3. Tur documento relaciona cu e aplicacion pa subsidio di salario mester wordo uploaded den MiSVb y den un solo documento (1 file). SVb no ta acepta documentonan via e-mail;
4. Despues di a upload e formulario fecha y cu firma di e trahadonan y di e dunado di trabou (number di compania y/of stempel di compania no ta un firma), mester yena e formulario di aplicacion;
5. E perdida di entrada di benta cu ta premira pa luna di september 2020 compara cu e entrada di benta real di luna di september 2019 mester wordo poni den un %. No por haci cambio na esaki despues cu entrega e aplicacion;
6. Despues di yena e formulario di aplicacion, ta primi ariba ENTREGA PETICION;
7. Dunado di trabou ta ricibi un confirmacion cu aplicacion a keda entrega;
8. No por haci cambio na e peticion despues di a entrega e aplicacion asina ta tuma e tempo pa yena e informacion corecto y sigura cu ta upload e formulario cu firma di e trahadonan corectamente y completo den un solo documento (1 file);
9. Percura pa e cuenta di banco di e compania ta corectamente registra den MiSVb.

TENE NA CUENTA CU E TA E RESPONSABILIDAD DI E DUNADO DI TRABOU PA CONTROLA E INFORMACION DI APLICACION Y NO DI E TRAHADO. EN CASO CU DUNADO DI TRABOU ENTREGA UN PETICION CU NO TA CORECTO Y/OF CU FALTA INFORMACION ESAKI TA CONDUCI NA RECHASO DI E PETICION PA SUBSIDIO DI SALARIO. VERIFICA TUR DOCUMENTO Y FORMULARIO PROME CU ENTREGA!

Pa facilita e dunado di trabou, SVb ta transferi e sumanan di subsidio di salario pa luna di september manera cu e aplicacion a keda aproba y SVb a confirma cu e dunado di trabou tin e salarionan real registra den MiSVb.

Si bo tin pregunta, tuma contacto cu nos service center digital na loonsubsidie@svbaruba.org.