Mas di 1600 dunado di trabou a aplica pa Subsidio di Salario

Ya ta un siman despues cu SVb Aruba a notifica e dunadonan di trabou cu ta bin na remarke pa ricibi sosten financiero di Gobierno di Aruba por medio di e programa Subsidio di Salario cu nan por yena e formulario di aplicacion digitalmente. Durante e siman aki a traha incansabel pa por brinda servicio na e dunado di trabou y guia nan durante e proceso nobo aki.
Subsidio di Salario ta un sosten financiero pa empresanan local cu a consecuencia di e situacion actual causa pa e pandemia COVID-19 ta sufri un perdida di entrada di benta di por lo menos 25%. No ta tur dunado di trabou a bin na remarke pa ricibi Subsidio di Salario. Tin un lista di rekisito cu e dunado di trabou mester cumpli cune. Algun rekisito ta cu e compania mester premira un perdida di entrada di benta pa su compania di por lo menos 25%. E compania mester ta registra na SVb y na Departamento di Impuesto y ta sigui cumpli cu pagonan di impuesto y primanan social. E Subsidio di Salario cu e dunado di trabou ta ricibi mester wordo usa pa paga salario di su trahadonan y e primanan social cu dunado di trabou mester paga. Dunadonan di trabou cu a wordo notifica cu nan no a bin na remarke pa aplica pa e programa Subsidio di Salario y no ta di acuerdo cu esaki tin te dia 2 di juni, 2020 pa manda nan carta di objeccion na bezwaarloonsubsidie@svbaruba.org.
Di alredor 3200 dunado di trabou cu pa luna di mei a bin na remarke pa por aplica pa e programa Subsidio di Salario, casi 1700 a haci uso di e oportunidad. Cu esaki por bisa cu pa luna di mei un 76% di trahadonan a keda cubri cu un garantia di pago parcial di nan salario.
E pago di Subsidio di Salario na e dunado di trabou lo tuma luga e siman aki ainda. Pa facilita e dunado di trabou y brinda e ayudo mas lihe posibel e Subsidio di Salario ta wordo paga den forma di un adelanto (na Hulandes un voorschot) a base di e perdida di entrada di benta premira pa e dunado di trabou pa luna di mei. Despues lo controla y fiha e suma di subsidio a base di entrada di benta real di e dunado di trabou pa luna di mei.
Dunadonan di trabou cu ainda tin pregunta relaciona cu e programa Subsidio di Salario por sigui manda nan pregunta pa e Service Center na loonsubsidie@svbaruba.org of via e number di Whatsapp +297 527-2801.