Notifica AO na 527-2782

En conexion cu e situacion actual di COVID-19/ Coronavirus nos ta adapta nos servicio di notifica AO. Entrante awe por notifica AO solamente via 527-2782. Esaki ta conta pa tur asegurado di SVb den sector priva ademas ta conta tambe pa ambtenaar den sector publico.

Notifica AO
Entrante awe tur asegurado mester notifica AO via di telefon 527-2782, y no por notifica AO mas via nos formulario pa notifica AO online of nos Webportaal/Medisoft te proximo aviso. E sistema di Webportaal/Medisoft lo keda habri pa por wak informacion.

Notifica AG
No tin nodo mas pa notifica AG. Den caso cu e trahado ta AO ainda riba e fecha cu ta poni AG e mester notifica AO atrobe via 527-2782.

Control Medico
SVb por lo pronto no lo haci control medico mas, pero lo atende cada yamada individualmente. Lo duna un fecha di AG ademas no lo ricibi control medico. Esaki ta nificia tambe cu na momento cu ta AO ainda riba e dia cu ta poni AG, mester yama 527-2782 atrobe pa notifica AO.
Den caso cu e dokter di control dicidi cu e asegurado mester ricibi un control medico, e asegurado lo wordo informa di esaki y lo ricibi un cita pa pasa SVb.

SVb no lo ricibi ningun hende na SVb pa control medico sin un cita.

Call Center
Den e ultimo dianan SVb a haci su maximo esfuerso pa reenforsa su Call center. Entrante awe e trabaonan pa esaki a keda cla, cual ta nifica cu e tempo pa warda ora di yama lo baha.

Ta importante pues ora di yama pa notifica AO pa tene cuenta cu lo siguiente:

• Orario pa yama ta di 7:00 AM te cu 12:00 PM y di 1:00 PM te cu 4:00 PM, den weekend di 7:00 AM te cu 11:00 AM.
• Ora di yama por fabor keda na liña. Cada yamada ta bay den un rij y ta wordo atendi riba secuencia di entrada. Na momento cu ta cera e telefon y yama atrobe e yamada ta wordo poni full patras den e rij.
• No por notifica AO online te proximo aviso. Esaki ta conta pa sector priva y publico (ambtenaar).
• Ora di yama sigui e instruccion di e operador di SVb. Por fabor tuma bon nota di e fecha di AG.

Nos ta ofrece nos disculpa pa cualkier inconveniencia, masha danki pa e comprension.

Pa mas informacion por tuma contacto cu SVb na info@svbaruba.org.

Pa mas informacion riba COVID-19 bishita https://www.arubacovid19.org.