SVb ta Habri Inscripcion Digital pa Doño di Trabao Nobo

Awe 14 di maart 2018 Banco di Seguro Social Aruba SVb ta habri e posibilidad pa doño di trabao nobo por inscribi nan mes mediante nos website. Inscripcion pa doño di trabao ta pa tur compania, stichting of organisacionnan cu ta opera na Aruba cual tin un of mas empleado den servicio. Entrante awe e doño di trabao por haci esaki na un forma mas conveniente debi cu no tin nodo di pasa mas na oficina di SVb personalmente pa haci e inscripcion. E posibilidad pa haci inscripcion na nos oficina ta keda habri si pa esnan cu ta desea di pasa personalmente.

Doño di trabao cu ta haci uso di e posibilidad aki por nota cu banda di wordo inscribi na SVb tambe ta haya acceso na e parti di nos website MiSVb. Akinan por log in y asina por inscribi empleado nobo of tuma contacto directo cu empleadonan di SVb. E servicionan digital aki lo sigui wordo amplia den futuro. Den e forma aki SVb ta facilita y accelera e proceso pa tur compania por inscribi nan mes y nan trahadonan nobo.

Doñonan di trabao cu ta desea di inscribi digital ta haci bon pa wak tur e rekisitonan di inscripcion prome cu habri e formulario. Debi cu ta rekiri pa añadi diferente documento oficial di e doño di trabao den forma digital, por ehempel inscripcion di Camara di Comercio, documentonan di banco ademas identificacion di empleadonan. Pa un lista di tur rekisito por wak riba nos pagina special pa inscripcion pa doño di trabao: https://www.svbaruba.org/dono-di-trabao/inscripcion/.

Doñonan di trabao cu ta desea di inscribi nan mes na SVb por habri e formulario akinan: https://www.svbaruba.org/dono-di-trabao/inscripcion-dono-di-trabao-nobo/. Ora di a caba di yena e formulario esaki ta wordo procesa pa nos coleganan di Departamento di Premieheffing. Despues di control di tur informacion e doño di trabao lo wordo notifica di su inscripcion dentro di 1 dia.

SVb lo sigui amplia e cantidad di servicionan cu ta ofrece su clientenan, specialmente lo sigui amplia e servicionan digital pa facilita mas nos clientenan.

Pa cualkier pregunta of remarka por tuma contacto cu Gino Croes, communicatiemedewerker SVb na 527-2740 of por email nos na info@svbaruba.org.