Healthy Indoors Workshops
Workshops pa un Lugar di Trabou Saludabel
SVb conhunto cu Fantastic Gardens y Viana Healing Center ta organisa 4 dia sumamente interesante cu varios topico relaciona cu crea y mantene un luga di trabou saludabel pa tur empleado.
Salud den e luga di trabou ta algo cu ta concerni nos tur pero desafortunadamente hopi biaha no ta haya su atencion debido. Den e siman di september 18 te cu 21 lo tin 4 dia yena cu informacion valioso pa tur e doñonan di trabou y personal di departamentonan di Recurso Humano. Tur organizacion cu kier siña cua factornan por afecta e salud di e empleadonan den nan luga di trabou lo haya e workshopsnan di interes. Lo ta bay tin recomendacionnan cu lo por yuda pa baha absentismo (AO) di cualkier organizacion sea den sector priva of publico.
E evento lo cuminsa diamars 18 di september cu e workshop “How to Grow Fresh Air with Plants” cu lo wordo duna dor di sr. Felipe Montoya. Den e workshop aki lo comparti cu organizacionnan con bo por crea aire fresco den cualkier luga di trabou cu ta den un edificio, kico ta e factornan pa tene cuenta cun’e, y tocante e mantencion di esaki. Ta conoci cu tin 10 matanan cu ta enrikece e aire den cualkier luga sera y ta purifica esaki cu oxigeno fresco den e ambiente. E realidad ta cu pa por disfruta pa temporada largo di e beneficionan aki den cuadro di bo salud, tin sierto medidanan cu mester wordo tuma pa por mantene e Oxygen Plants nan aki. Sr. Montoya lo elabora riba esaki.
Dia 19 di september Dr. Carlos Viana di Viana Healing Center lo toca e tema di “What the Beep! Bio-compatible Employee Enrichment Programs”. Aki lo comparti differente factornan cu no ta visibel ni tampoco tangibel pero cu ta presente den luganan di trabou manera oficina. En particular luganan cu no tin mucho ventilacion tin varios aspectonan cu lo por haci empleadonan malo sin cu nan por ripara ni tuma nota di esaki. Varios biaha ora cu e empleado a manifesta e sintomanan ya ta laat paso e ta bira malo cu consecuencia cu e lo bay AO. Dr. Viana lo comparti na tur presente su experencia y conocimento amplio di e material di malesanan relaciona cu trabou pero tambe kico e organisacionnan por haci pa preveni e situacion pa bira malo. Dr. Viana lo comparti tocante e Bio-compatible Employee Enrichment Programs cu el a desaroya.
Dia 20 di september Sra. Flora de Vries- Petronilia lo presenta un topico serio pero actual na Aruba di “Sick Building Syndrom”. E berdad por ta duro pero como gerencia e ta importante pa evalua si e luga di trabou no ta pasando birando un edificio di malesa o mihor dicho un “Sick Building”. Kico e fenomeno aki ta, con e ta afecta e productividad y absentismo pa cualkier organizacion ta djis un par di informacion cu lo wordo comparti den e workshop aki door di Sra. De Vries-Petronilia. E enfoke ta pa percura cu tin un plan di prevencion pa evita cu pa motibo di e sindroma aki cu e empleadonan su bienestar y salud ta bay atras te hasta bira critico. SVb ta na disposicion di tur organizacionnan publico y priva pa acepta e invitacion aki. E compromiso pa baha e absentismo door di malesa ta un responsabilidad mutuo entre e dunado di trabou y e empleado. Den esaki SVb tey pa por guia e proceso aki y duna recomendacionnan pa un luga di trabou mas saludabel, puro, y na final cu ta mas productivo.
E ultimo dia di e secuencia di workshops lo ta den seno di un Panel Discussion y Interactive Workshop entre e participantenan y tur e 3 oradornan. Durante esaki lo conclui e siman cu kiko cada representante a hanya mas interesante, practica, y pa por aplica esaki den su luga di trabou na bienestar di e empleadonan cu ta traha den e edificio di e organizacion concerni. Tur participane lo ricibi un Certificado di Participacion como aprecio pa a atende e sessionnan cu lo hasi un impacto positivo na e estado di salud di e empleadonan.
E oportunidad aki ta wordo extendi na dur doño di trabou, hefe di departamento di Gobierno, ehecutivo di Recurso Humano, y cualkier miembro di gerencia cu ta concerni e topico di crea un ambiente saludabel di trabou pa su personal cu ta traha den un luga di trabou cu ta paden y ta un espacio sera. Tur workshops ta completamente gratis y cada organizacion por manda maximo 2 representante pa atende e siman di “Healthy Indoor Environment Workshops”. Pa mas informacion y pa registra por yama 592-2770 of tambe por manda un email na commercial@fantasticgardensaruba.com.
